MV=PQ & 滯縮

發人深醒的文章 節錄自曹仁超先生

Stag-deflation（停滯通縮）乃新名詞，由紐約大學教授Nouriel Roubini所創造。佢認為因失業率上升而產生勞工成本受壓抑（即唔再加薪，或失業後找回工作但薪金下降），漸漸令商品價格回落，進入低CPI時期（例如只有1到2％通脹率），引發流動性陷阱（Liquidity trap），最終出現債務通縮（debt deflation）。最初仍可由政府壓抑利率去對付，到利率見1厘時，代表聯儲局（或中央銀行）已採用水浸金融系統策略，如經濟仍不能復甦，代表stag-deflation已經形成，即使將利率減至零亦冇用（例如過去日本）。

減息只會引發更少消費及投資，令收入及工作機會進一步減少，人們傾向減少負債，即debt deflation開始，令信貸進一步失去。傳統貨幣政策失效，只有依賴外來力量才能令經濟再次復甦（例如2003年下半年日本復甦係由美國同中國拉動）。由於美國係全球最大既經濟體系，冇一個國家有足夠力量重新啟動美國經濟增長。過去一年全球失去信貸已高達2萬億美元，未來兩年美國財赤每年高達1萬億美元，令美國政府長期償債能力亦受質疑。隨着對沖基金退出市場，去槓桿化繼續落去，令揸樓作投資既人最後亦被迫出售資產，令槓桿進一步受壓抑，無償債能力既金融機構破產，部分新興市場甚至出現金融危機。上述將係2009年我地面對既問題。

貨幣流速減慢令GDP下降亦有人指出，政府為挽救金融機構而大量增加信貸，遲早令貨幣供應上升，最後令美元貶值、金價升上2000美元，而令通脹重臨而非通縮。到底兩種講法邊種可信？Lacy Hunt博士認為，貨幣基礎（monetary base）正以年率1400％速度上升，或遲或早令金價升上2000美元。不過，杜氏理論通訊作者Richard Russel（現年八十四歲，我老曹自1975年起透過閱讀佢投資通訊學習杜氏理論）認為，如美元供應真係咁大，點解美元滙價不跌反升？另一位專家Millennium Wave Advisors 主席John Mauldlin認為，美元流速在下降，聯儲局並冇製造大量「貨幣」，只係將銀行部分負債貨幣化（monetizing the debt）。即銀行將部分負債向聯儲局換成國庫券，並喺市場拋售換取現金，以應付客戶提款。
換言之，聯儲局只提供國庫券而唔係提供現金，聯儲局只增加銀行流動性（liquidity）而非提供現金（cash）。銀行將唔流通資產（例如客戶負債）轉為流通資產（國庫券）响市場拋售，以便銀行之間可繼續進行同業拆放。另一間銀行買入國庫券後，又交回聯儲局作為資產抵押（銀行必須喺聯儲局有一定抵押品，即存款保證金率），响整個過程中並冇產生新現金。貨幣基礎的確大咗，但貨幣（Money）增長率反由未出事前既年率18％增長回落到依家既10％，未來不但冇通脹壓力，反而有通縮壓力。

除上述外，金錢流速（Velocity of Money）亦有關係，例如100美元每月轉手兩次，一年下來便有2400美元交易完成；反之，如100美元每月轉手一次，一年下來便只有1200美元交易完成。GDP等於MV（貨幣供應及貨幣流速），貨幣流速下降可令GDP增長率下降而引發通縮。從呢點睇，美元滙價崩潰論基本上唔成立。1929年9月後引發大蕭條並非貨幣供應減少，而係貨幣流速下降（即V下降而非M下降）。再睇1990至97年美國L增長率下降，點解經濟卻繁榮、通脹率上升？就係因為V流速加快（因大量CDO產生）。依家面對CDO unwind令V流速減慢，即使L加快上升，結果仍係GDP增長率下降，通脹減慢甚至引發通縮，聯儲局一再減息亦無法抗拒。

另外，全球基金積極deleverage 令財富效應消失，人們預期經濟長期收縮會增加儲蓄導致加速 velocity 下降 ! 政府新增既資金實際用於 real economy 不多，因為聯儲局增加money supply 主要用open market operation，太部分資金要透過商業銀行 ( financial immediate ) 才能夠拆出市場。當商業銀行貸款謹慎，velocity 無可避免下降，令經濟加劇收縮。現在monetary policy 效用不大，政府變成最後既貸款人，美國三大車廠從正常途徑下借唔到新資金，所以一而再再而三有 bailout 出現。